Суотту нэhилиэгэр күн бүгүн саха ааҕааччытыгар киэңник биллэр икки суруйааччылаахпыт. Иванова А.М. – Бээрийэ кыыhа Хотойук Айгыына уонна Попов И.П. – Оҕуруоттаах.

   Быйылгы дьылга биһиги айар куттаах дьоммут, уран тыл умсулҕаныгар куустаран, айар аартыктара арыллан саңа айымньыларын кинигэ оңорон киэң ааҕааччы болҕомтотугар таhаардылар. Ол курдук, Саха Ɵрѳспүүбүлүкэтин суруйааччыларын сойууһун чилиэнэ кэпсээнньит, хоhоонньут, драматург, сценарист И.П. Попов – Оҕуруоттаах саңа икки кинигэтэ күн сирин кѳрдүлэр: «Олох тыйыскын, кэрэҕин даҕаны», «Олоҕум омоон суола».    

  «Дьээбэрэң» улуустааҕы, ѳрѳспүүбүлүкэтээҕи күрэхтэрин хас да тѳгүллээх Гран При хаhаайына, «Кэпсэтии жанрын маастара», «Бастың ааптар» анал ааттар хаhаайыннара, норуодунай тыйаатырдар кѳрүү күрэхтэригэр кэмиэдьийэ кѳрүңэр «Бастың» кэмиэдьийэ ааптара. Улуустаа5ы, ѳрѳспүүбүлүкэтээҕи литэрэтиирэ куонкурустарын кыайыылааҕа Оҕуруоттаах суруйуулара олоҕу кытта ыкса ситимнээхтэр, тыа үлэhит дьонун олоҕун уустаан-ураннаан ойуулууллар. Олох араас түгэннэрин, күлүүлээх да, харах уулаах да түбэлтэлэри табатык кѳрдѳрѳн ааҕааччы болҕомтотун тардар аналлаахтар, Кинигэ дьоруойдара үксүлэрэ олохторугар сыыhаны-халтыны оңорбут да буоллахтарына сырдыкка, үтүѳҕэ тардыhыыларын күүhүнэн кѳнѳ суолу тутуhаллара ордук кэрэхсэбиллээх. Ааптар үгүс кэпсээннэрин хоhоонунан ситэрэн биэрбитэ айымньы ис хоhоонун дириңэтэн ааҕааччыга тиэрдэр уонна саха уус-уран литэрэтиирэтигэр саңа сүүрээн быhыытынан сонуннук кѳстѳр.

   Оҕуруоттаах суруйууларын ѳссѳ биир хайысхатынан буолар дьиңнээх олоххо олоҕурбут, дьон суруйбут ахтыыларынан уус-уран айымньыны суруйуу. Бу хайыска ааптарга олус табыллар уонна ааҕааччы кэрэхсэбилин, сэңээриитин ылар. Ол курдук, О5уруоттаах быйыл тахсыбыт «Олоҕум омоон суола» кинигэтэ, атын айымньыларын курдук, библиотека полкатыгар ѳр сыппакка ааҕааччыттан ааҕааччыга уларсылла туруо диэн эрэллээхпин.    

   Суотту нэһилиэгэр оҕо сааhыттан олохсуйан олорор Бээрийэттэн тѳрүттээх, айар тыл умсулҕаныгар уйдаран элбэх хоhооннору, кэпсээннэри суруйан бар дьонугар бэлэх уунар, Саха Ɵрѳспүүбүлүкэтин суруйааччыларын сойууһун чилиэнэ, суруналыыс, прозаик, хоһоонньут, «Киин куорат» хаһыат уопсастыбаннай кэрэспэндьиэнэ Бээрийэ кыыһа Хотойук Айгыына быйыл «Тэпсиллибит сибэкки» кэпсээннэрин бастакы кинигэтэ күн сирин кѳрдѳ. Бу дьоҕус кинигэ сүрдээх уустук дьылҕалаах дьон олохторун ойуулуур.    

   Кинигэҕэ киирбит кэпсээннэр элбэх киһи, оҕо, дьахтар олоҕо арыгыттан айманарын, мантан сылтаан араас быһылааннар, бѳрүкүтэ суох быһыы-майгы тахсарын итэҕэтиилээхтик ойуулууллар. Дьиэ иһигэр аймалҕан, дэриэбинэҕэ киhи хомойор, санаата түhэр түбэлтэлэрэ тахсыылара арыгы аргыстааҕын ѳйдѳѳң диэн ааптар ааҕааччытыгар тиэрдэ сатыыр курдук. Хобдох быhыы-майгы, олоххо түѳрэккэй суолу батыhыы бу барыта хараңа ѳрүттэри күүhүрдэр, чугас дьонуң ыарахан дьылҕаланыыларыгар тиэрдэр диэн ѳйдүѳхтээхпит.

   Бу кинигэни ааҕан баран олоххо мэлдьи хараңаны сырдык баhыйдар ханнык диэн баҕа санааң күүhүрэр. Кинигэҕэ ойууламмыт дьылҕалар аны хатыламматыннар. Күннэтэ сырдыкка тардыhыахха, олох үтүѳтүн-кэрэтин эрэ тутуhуохха, сыыспыт да буоллахха кѳннѳрүѳххэ, ыччатың, кэскилиң туhугар үчүгэйгэ дьулуhуохха, ийэ-аҕа буолуу аналын чиэстээхтик толорон үтүѳ ыччаты иитиэххэ диэн түмүккэ кэлиэхтээхпит.

Талба талааннаах, уус уран тыл уолбат уйгутугар үлэлии, айа-тута сылдьар дьоммутугар Бээрийэ кыыhа Хотойук Айгыынаҕа, О5уруоттаахха баҕарыа этибит айар аартыккыт кэңээн, сырдаан истин, үчүгэйтэн үчүгэй, кэрэхсэбиллээх суруйуулар эhиги ааккытын-суолгутун аатырдан, үрдүккэ кѳтүтэн истиннэр.