Хоһоонньут, чабырҕахсыт, саха тылын, сиэрин-туомун, үгэстэрин ырытан сурукка тиспит норуот талааннааҕа, фольклорист, биир дойдулаахпыт Екатерина Местникова
айар үлэҕэ бастакы хардыыларын туһунан суруйуутун ааҕыҥ.
Бэйэтин ахтыыта
Мин, Местникова Екатерина Констпнтиновна, Суотту орто оскуолатыгар бастаан харабылынан, онтон буфетчицанан үлэлээбитим.
Бу иннинэ төрөөбүт сирбэр-дойдубар Мүрү алааска элбэх үлэһиттээх быткомбинат диэн тэрилтэҕэ кассирынан үлэлии сылдьыбытым. Бу тэрилтэ үлэһиттэрин куһаҕан коллектив этэ диирин диэбэппин эрээри Суотту орто оскуолатыгар үлэлээбит сылларбын олус үчүгэйдик, истиҥник саныыбын.
Мүрүгэ олордохпутуна аҕабытын Суоттуга орто оскуола тутуутугар биригэдьииринэн анаабыттара, онон Суоттуга көһөр буолбуппут. Суоттуга тиийээт оскуола таһыгар дьиэ туттан олохсуйардыы тэриммиппит.
Оскуолаҕа үлэҕэ киирээт бэйэм да билбэппинэн коллектив иһигэр, хайдах эрэ өтөн киирэр курдук, киирэн хаалбытым.
Оҕолорум үөрэнэллэрин быһыытынан оскуолаҕа буолар кылаастар концертарын биири да көтүппэккэ көрөрүм, бэл пионерскай сбордарга сылдьарым, оҕолорбун батыһан кулуупка тиийэ барарым, оччолорго улахан концертаргв монтаж диэн ааҕаллара, оҕолорум онно кытталлара.
Ол курдук харабыллыы сырыттахпына оскуолаҕа буфетчицанан анаабыттара. Буфетка үлэлиир сылларбар тэһэ астаран кыра хоһооннору суруйар идэлэммитим. Ону тута иилэ хабан, сэҥээрэн кылаастар концертарыгар хоһоон үлэһэр буолбуттара. Онтон тирэх ылан улам-улам чабырҕахтыы суруллубут хоһооннору айар буолбутум. Баларбын тоҕоостоох кэмигэр түбэһиннэрэн коллектив барыта баарыгар ааҕыталыыр буолбутум. Маныаха чабырҕахтарбын бу айылаах сэҥээрдэхтэрин, ис-истэриттэн дьиҥнээхтии күллэхтэрин! Киһи эрэ сүргэтэ көтөҕүллэр, салгыы суруйбут киһи диир баҕа санаа үөскүүр. Хоһооннорум хаһыакка бэчээттэнэн, бэчээттэммиттэрим улам элбээн барбыттара. Хоһооннорбун сэҥээрэн улаханнык соһуппут киһибинэн Людмила Семеновна буолар. Биирдэ учительскайга киирбиппэр: "Катя, көр эрэ" диэн мин хоһооннорбун хаһыаттан кырыйан, олус да кичэйэн, олус да үчүгэй гына тэтэрээккэ сыһыаран илдьэ сылдьарын көрдөрбүтэ. Бу сэҥээрии буолбатах дуо?! Мин испэр "аата, үчүгэйин! Мин да итинник оҥорбут буолбаппын" дии санаатым. Ол курдук миэннэрэ тэтэрээт хаҕыгар (хата хайаан көстүбүтэй диэх курдук) уурулла сылдьаллара. Соһуйбутум күүһүттэн биир да тылы быктарбакка даллайан баран турбутум.
Кыралаан хоһоон суруйан саҕалыахпыттан ыла эппитим курдук "хоһоонно суруйан кулу" диэччи элбээн испитэ. Ол курдук, миэхэ "үчүгэй үөрэнээччи туһунан суруй", "куһаҕан үөрэнээччи туһунан суруй", "кирдээх кинигэ, тэтэрээт туһунан суруй", "открытка кэннигэр 50 сааска аналлаах эҕэрдэтэ суруй" диэччи элбээн испитэ. Билигин кырдьан олорон санаатахпына дьылҕам миигин төрөөбүт сирбиттэн көһөрөн Суоттуга киллэрэн итинник үчүгэй коллективы кытта анаан билсиһиннэрбит эбит. Онон дьылҕабар, Суотту орто оскуолатын коллективыгар махталым улахан. Чахчы киһи быһыытынан сайаҕас, чахчы төрөөбүт тылларын үчүгэйдик билэр дьону кытта алтыһан ааспыт эбиппин.
Муус устар ый, 2000 сыл
"Сахалыы саҥарар буоллахха" кинигэттэн
